1A_24: Anaka, ekenao ve ny ho lasa tahaka an’io fo izay tia tanteraka io, ho tahaka Ahy nitia, tia ary hitia… miaraka amin’ireo fijaliana, ireo hafaliana, ny fiadanam-po sy ny Fitiavana aterak’izany, izay afaka tsy ho omenao fotsiny ihany fa ho azonao koa ? Miandry ny valin-teninao Aho. Tiako ianao.

1A_08: Anaka, manaiky ve ianao  ho Ahy ilay tsy miaina afa tsy ho Ahy? Ilay mandà ny fahafinaretany, ny endriny tiany hijeren’ny olona azy, ny lazany, ary indrindra ireo fihevitrao? Valio Aho !

1D_38: Anaka, eo am-pelatànan’Andriamanitra avokoa ny zavatra rehetra, tsy tokony hisy hatahoranao. Tsy tokony hanana adin-tsaina na fiahiahiana ianao na iray aza, satria fantatrao fa ny Rainao izay tia anao tanteraka no mikarakara ny zavatra rehetra hatramin’ny madinika indrindra… Rehefa manolo-tena bebekokoa ianao, dia afaka miasa bebe kokoa mba hanafaka sy hameno anao ny Ray.

2A_02: Ry bitikako, vavolombelona tokoa ianao izao fa tsy ianao no miasa, fa tena ny Fanahy Masina izay miasa ao anatinao, manodidina anao, amin’ny alalanao. Andao hiaraka isika, misaotra ny Ray mba ho tanteraka izany. Avelao tantànako ianao, atodio any amin’ny Ray ny fijerinao, banjino miaraka amiko ny tambitambiny mba hampiasany anao na dia afaka mahavita asa irery aza Izy. Banjino ny Famindram- pony mba hampiasany anao na dia tsy mbola tonga lafatra aza ianao.

1A_15: R’ilay Bitikako, mianatra ny Fitiavana ianao ankehitriny. Nofidiko ianao ; ilaiko ianao. Tsy izay ataonao na izay lazainao no zava-dehibe, fa ny Fitiavana izay mitoetra ao anaty fonao.

1C_39: Anaka, homany ny fonao amin’ny vavaka sy ny fandàvana ny tenanao, mba hatonga anao mihaino Ahy bebekokoa, tsy ny Teniko sy ireny tolo-tsaina ireny ihany, fa koa, ary indrindra, amin’ireny zava-mitranga mahafinaritra na mampalahelo ireny. Raha avelako hiaina an’ireny ianao, dia fampianarana ho anao ireny, izay tokony horaisinao mba hitomboinao.

2A_14: Ry bitikako, nohariana tamin’ny Fitiavana ianao mba ho tonga IRAY aminy ; ny fifandraisana amin’izy roa dia ny fonao. Mila mianatra miaina eo amin’ny fonao izany ianao ; izany no ianaranao rehefa mitoetra samy irery miaraka Amiko ao anatinao lalina iny ianao.

3B_10: Anaka, atolory an’ny Ray avokoa na ny mahafinaritra na ny mahasosotra, na ny tsara na ny ratsy. Tsy havesatra aminao intsony io lasanao io raha omenao ny Famindram-pon’ny Ray satria tsy hilanja izany intsony ianao. Apetraky ny Ray eo ambanin’ny tongotrao ny lasanao, tahaka ny vato, mba hisondrotanao mankany Aminy.

1B_26: R’ilay Bitikako, rehefa miha-tonga Fitiavana ianao, dia miha-mahery koa ny jironao. Ary mba ho tanteraka izany, dia tokony ho olon’ny Fitiavana ianao. Mba ho tonga io olon’ny Fitiavana io, dia tokony hanaiky ho Tiaviko, Izaho izay Tomponao sy Andriamanitrao, ianao. Amin’izay, dia lasa IRAY ao anatin’ny Fitiavana isika.

1E_15: Anaka, rehefa mia-manaiky handany fotoana miaraka Amiko ianao, ary mia-mandray ny Fitiavako, dia mia-afaka mampiasa anao koa Aho mba hihaona amin’ireo zanako hafa koa izay tiako tokoa. Mila olona izy ireo hihaino, ao amin’ireo sofiny, izay efa reny tao am-pony. Tiako ianao.